Mae Cymorth i Fenywod Cymru’n sefydliad sy’n rhoi cefnogaeth gyfrinachol i fenywod, plant a phobl ifanc yr effeithir arnynt gan gam-drin yn y cartref.
Dyma rai o’r ffyrdd y gallwn eich helpu.....
Gweithwyr Plant
Dyma fenywod sydd ar gael i weithio’n benodol gyda phlant a phobl ifanc. Maen nhw ar gael i;

Wrando arnoch chi
Eich helpu i leisio eich barn, cyflwyno eich safbwynt
Eich helpu i ymdopi gyda’r holl newidiadau ac ymgartrefu yn eich amgylchiadau newydd
Eich helpu i gadw mewn cysylltiad â phobl yr ydych wedi eu gadael
Trefnu gweithgareddau yn y tŷ i’ch atal rhag teimlo’n ddiflas, megis peintio, gwneud modelau, gemau
Eich cefnogi wrth fynd i’r ysgol
Eich helpu i barhau â’ch hoff ddiddordebau neu ddatblygu rhai newydd
Eich helpu i ddod o hyd i ffyrdd o gadw’n ddiogel

Llochesau
Mae gennym grwpiau Cymorth i Fenywod lleol mewn llawer o drefi ar draws Cymru. Caiff y grwpiau hyn eu rhedeg gan fenywod sydd ar gael i’ch helpu chi a’ch mam. Mae pob un ohonynt yn darparu llochesau sef yr enw am gartrefi ‘diogel’ arbennig. Tai yw llochesau y gall menywod a phlant fynd i aros ynddyn nhw a dianc rhag cam-drin yn y cartref. Mae’n lle i chi aros tra bod eich Mam a chithau’n penderfynu beth i’w wneud nesaf. Mae menywod a phlant eraill sydd wedi dianc rhag camdriniaeth yn eu cartrefi’n rhannu’r tŷ. Mae pawb sy’n byw yno wedi dod am fod angen iddynt ddianc o’u cartref. Yn y lloches, byddwch yn rhannu ystafell wely gyda’ch Mam a’ch brodyr a’ch chwiorydd (os oes rhai gennych). Byddwch yn rhannu ystafelloedd fel y gegin, ystafelloedd ymolchi, ystafell fyw a’r ardd gyda’r teuluoedd eraill. Bydd hyn yn rhyfedd i ddechrau ond mae llawer o bobl yn gwneud ffrindiau da gyda’r bobl maen nhw’n rhannu â nhw. Mae cael cwmni pobl ifanc eraill yn gallu’ch helpu i deimlo’n llai unig am eich sefyllfa. Nid yw byw mewn lloches bob amser yn hawdd, ond cofiwch mai dim ond am gyfnod byr ydyw nes i’ch Mam benderfynu beth sydd orau i chi. Mae angen i chi siarad â hi a rhoi gwybod iddi sut yr ydych yn teimlo gan ei fod yn bwysig ei bod yn ystyried safbwynt pawb.

 Dyma rai lluniau a gymerwyd mewn lloches i roi syniad i chi o'r hyn ydyw.

Gwasanaethau allgymorth
Does dim rhaid i chi symud i loches. Mae gan lawer o’r grwpiau weithwyr sy’n cefnogi menywod a phlant yn eu cartrefi eu hunain. Efallai bod y person a oedd yn cam-drin wedi symud o’r tŷ neu efallai eich bod chi wedi symud i dŷ newydd ond bod angen help arnoch i ymgartrefu. Gall gweithwyr ymweld â chi yn eich cartref neu drefnu cwrdd â chi rhywle arall.